Alla Itolae Nusa 19
Eleki malekata lua meru esi luake mpe kota Sodome kena kmau peneka. Kena mere Lote irue me kotare esi meture, eleki kena iseluise, ikeu sapasi. Eleki itatu lope tapele lokosi.
Eleki ibeteke be, “Ntuana imi, imi sili mei auku luma mina. Kai imi koa imi lelalaru kai imi ntulu mei auku luma mina, namake bobanu bebeleti pine imi keu rame sa.”
Po esi beteke be, “Yanoma, ami nutulu me tandapane neka.”
Po Lote irare ktili kuate hoko esi sili me eni luma ne. Eleki Lote iono manane etesi, ipala roti rebe pake ragi mo, eleki esi kane.
Po kena esi ntulu mosa, tamata mokwai Sodoma belukaru eti roma elaka inaiju pususi luake kai esi kele keholi luma mere.
Eleki esi kloloe loko Lote be, “Tamata rebe esi luake lokomu kena kpetu meije esi etia? Siriesi lomei leke ami ntulu kaisi.”
Eleki Lote isiri lokosi kai ikwara meture kuru bei me muli.
Eleki ibeteke lokosi be, “Kwalia, imi ono neune ele mere yake!
Imi lene, kuanae bina sie luaya mei, esi ntulu rebai sae kai mokwai mosa. Hoko au siriesi ete imi leke sebeie imi onosi lulu imi suka. Mabe imi ono yelu tiaru kena tamata meiju yake, le esi luake mei auku luma hoko suke rakasi bei yelu tiaru.”
Po esi beteke loko Lote be, “Aheti! Ale mere tamata maka luake beluke. Aluake lomei kena apleta ami! Ami ono tiae lesi ete ale, bei tamata lua meru.” Eleki esi rupake Lote kai esi tehaike meture kai esi ono kena esi hbutae.
Po tamata lua meru esi neha Lote ikusu eleki esi kwara meture.
Eleki luasi ono tamata bokala meru pususi selu moneka hoko esi selu meture moneka.
Eleki tamata lua meru esi beteke loko Lote be, “Sepo amu kwete mokwai, kwete bina, nanae tamoli pise kwali tau maketa me esi mei kota meije, akerisi siri bei kota meije,
le namake ami atia kota meije, le kota meije esi tiare tamata esi lepaele, TUHANE Ilene peneka. Hoko TUHANE Iulake ami lomei kena atia kota meije.”
Eleki Lote isiri kai ikeu beteke loko kwete mokwaia lua rebe tatike pine esi kai kai eni nana bina luaru be, “Siri nunu bei kota meije le TUHANE Iatia kota meije reneka.” Po luasi lene lokoi mo, le esi noake be mere batuke ilepa kleklema neka.
Eleki kena kasinake menaije tamata lua meru esi kahula Lote leke nunu, esi ombe, “Keu nununu le amu bina kai amu anaru imi siri bei kota meije leke kota meije esi neune eono imi mata yake.”
TUHANE laleIje noasi hoko kena eri papae sa, sie luaya meru esi kerike Lote, eni bina kai eni nanaru balaisu, luasi kerisi siri bei kotare leke erisi keu.
Kena esi siri bei kotare ile sae bei sie luaya meru ibeteke lokosi be, “Imi naya, leke imi mata yake. Kai imi hali muli yake kai imi tola me otoi Yordane keholi moneka, po imi naya lolete ulate rame leke imi mata yake.”
Po Lote ibeteke be, “Ami naya lolete ulate yanoma!
Ntuana imi tapa ami peneka kai ono ami hlamate peneka, po naya lolete ulate lau kuate hoko tinake ami rome ndete mosa yo ami mata bei susate mere peneka.
Selu, kota tone mpaije lau kuate mo kena naya lopai lokole. Kota mpaije batuke kota tone neka. Hoko sebeie ami naya lopai noma leke ami mata yake.”
Eleki tamata mere ibeteke be, “Yele, kota tone mere au atia mo.
Hoko naya nununu! Le imi luake mpai mosa hoko au ono sasaisa mosa.”
Lote ibeteke kota mere tone, hoko esi nane Soare, esi natire tone.
Hoko Lote iluake me Soare, lemataije katabola.
Eleki TUHANE Iono auwe klitini kai belerane tetu bei ndete lanite saka ulane kena kota Sodome kai Gomora.
Hoko atia pusue kota lua meru, kai pusue kweune mere, esi tnanelaru kai pusue tamata.
Po kena mere Lote eni bina ihali lo mulini eleki iono lelie lili tasie.
Eleki esi bobanu bebeleite Abrahame ikeu me otoi rebe memane ikele kai TUHANE,
eleki imanoue Sodome kai Gomora kai iselu pusue otoi meru, hoko iselu auwe kweine ebubuke ela titinai bei otoi mere. Mere sae iselue rebai sae mosa.
Alla Iatia kotaya me Yordane esi kweune kai kota rebe Lote irue kenare, Alla Ioki Abrahame kai Iono Lote inaya leke ihlamate, uonore ele mere.
Lote rilai kena irue me Soare, hoko ikeu kai eni nanae bina luaru lolete ulate, eleki esi rue kena liane sae me.
Eleki kwete bina menare ibeteke loko kwalini be, “Amate intua peneka kai ete meije mokwai kena ikai ite kena supu kwetele sae mo.
Mai ite inuke amate leke inseli, eleki ite ntulu kaini leke ite supu kwetele etei.”
Eleki kena kpeture esi ono esi amare kinu Anggure eti inseli titinai. Eleki kwete menare ikusu ntulu kai amai. Hoko saisa eonore irekwa mo le inseli kuate.
Eleki bobanure kwete bina menare ibeteke loko kwalini be, “Mempetuke au ntulu kai amate peneka hoko toto kpeture ite inuke amate lekwe eleki akusu ntulu kaini leke ite supu kwetele etei.”
Eleki kena kpeture esi ono esi amare ikinu Anggure eti inseli titinai, eleki kwete bina mulire ikusu ntulu kai amai. Hoko saisa eonore irekwa mo le inseli kuate.
Eleki kwete bina lua meru esi keu blublulu. Esi keu blublulu mere bei lua amasi ruai.
Kwete bina menare iruele kwete mokwai eleki iono eni nane Moape. Ile mere pine eni anubua kena tamata Moaparu.
Kwete bina mulire iruele kwete mokwai lekwe, iono eni nane Ben-Ami. Ile mere pine eni anubua kena tamata Amonaru.